تعليقات حول كلمه الأخ مبارك الأخيره

مع اني بقالي كتير، من ايام ما اتحي مبارك ياعني ولا سمعت صوتوا ولا شوفت طلعته البهيه، الا اني اكتشفت ان صوته لسه بيوترني وبيضايقني، وكان نفسي اقلب القناه فالحقيقيه، بس من الواضح اني كنت طول اليوم بضور علي  طريقه اغيظ بها نفسي ومش لاقيه، واتضح ان ده اسهل طريقه تغيظ نفسك بيها

وانا بسمع الكلمه مش عارفه ايه حسيت انه كان طالع يجيب المراره لباقي الشعب اللي مجالهمش سكر او ضغط اثناء خطابات الثوره

وادي الكلمه عشان لو كان اي حد ما سمعهاش ولو انه ما يسمعش وحش ياعني

انا عندي ملحوظتين بقي ماعرفش انا عندي حق فيهم ولا لا بس هقولهم وخلاص

اول حاجه انه قال انه مستعد لتقديم مكاتبات بس يجي بنفسه لا، دي نقطه كلنا خدنا بالنا منها وفهمناها اكتر لما عرفنا ان النائب العام كان طالبه للتحقيق اصلا

النقطه التانيه اللي لغايت دلوقتي مشفتش ناس كتير بتتكلم فيها ان مبارك قال انه وزوجته لا يملكوا اي ارصده بالخارج، ياعني اولاده يملكوا ارصده بالخارج، طب مش غاريبه دي شويه؟ طب ليه ما خباش؟ كان بيحاوليبقي صريح ياعني ولا ايه؟

المهم ان موضوع التحقيق مع مبارك ده هوا اللي بيفسر كل اللي كان بيحصل في الفتره اللي فاتت من مشاكل امنيه كترت تاني حتي احداث التحرير، والي كل الناس اللي كانت بتسآل الفتره اللي فاتتت هوا ابه الليبحصل - وانا كنت منهم- فالاجابه كانت واضحه النهارده

اظرف تعليق بقي اتكتب عالغيسبوك كان بيقول انه كآننا عايشين في فيلم رعب وبعد مشهد النهايه الوحش يحرك ايده من تحت الانقاض والشاشه تكتب"النهايه" بس طبعا الوحش برضه ماماتش ولسه عايش ولازم ناخد بالنا منه